Lover for Studentmållaget i Nidaros
Føremål
§ 1 Studentmållaget i Nidaros arbeider for at alle i Noreg
skal velja nynorsk i staden for bokmål, og for å styrkja dialektane.
Til grunn for målreisinga ligg ein breiare strid for norskdom,
nasjonal sjølvråderett og folkeleg daning. Studentmållaget i
Nidaros vil organisera studentar til å føra denne striden.
§ 2 Studentmållaget i Nidaros skal arbeida i samsvar med
føremålet, arbeidsprogrammet og lovene til Norsk Målungdom.
Medlemskap
§ 3 Studentmållaget i Nidaros er eit lag i Norsk Målungdom
og ein del av regionslaget Målungdomen i Trøndelag og på
Nordmøre.
§ 4 Alle som godkjenner føremålet til Norsk Målungdom og
svarer medlemspengar, er medlemer i Studentmållaget i Nidaros.
§ 6 Medlemer eller sympatisørar av rasistiske og/eller
nazistiske samskipnader kan ikkje vera medlemer i
Studentmållaget i Nidaros.
§ 7 Styret kan ekskludera medlemer som motarbeider føremålet
til laget. Slike eksklusjonsvedtak lyt godkjennast av eit
medlemsmøte i laget.
Årsmøtet
§ 8 Årsmøtet skal vera kunngjort pr. brev minst 3 veker
føreåt. Saklista skal liggja med i innkallinga. Omframt
årsmøte skal haldast når årsmøtet, lovleg innkalla medlemsmøte,
styret i laget eller 1/3 av medlemene krev det.
§ 9 På årsmøtet skal følgjande saker opp:
- årsmelding
- rekneskap
- arbeidsprogram
- medlemspengesats
- budsjett
- val av: leiar, økonomiandsvarleg og minst ein styremedlem
- val av utsendingar til årsmøtet i Målungdomen i
Trøndelag og på Nordmøre og landsmøtet til Norsk
Målungdom og landsmøtet til Noregs Mållag.
I tillegg skal årsmøtet skjøtta andre saker som styret legg
fram for det.
Arbeidet til styret
§ 10 Styret vel seg i mellom nestleiar, skrivar og
kassastyrar.
§ 11 Styret leier arbeidet i laget. Det har òg andsvaret
for arbeidet i nemnder.
§ 12 Styret tek i mot innmeldingar i laget.
§ 13 Styret skal syta for at årsmøtet får årsmelding og
rekneskap. Dessutan skal det leggjast fram arbeidsprogram og
budsjett for det nye arbeidsåret.
§ 14 Styret rår over eiga og skal driva laget på ein
økonomisk forsvarleg måte i samsvar med arbeidsprogram og
budsjett.
Røysterett
§ 15 Alle lagsfolk som har svara medlemspengar har
røysterett på årsmøtet og på lagsmøte.
Eiga
§ 16 Vert laget lagt ned eller skifter føremål so det
ikkje lenger kan stå i Norsk Målungdom, skal styret i
distriktslaget taka vare på middelen til laget kjem i
gang att, eller det vert skipa nytt lag på same staden
som fyller krava til medlemskap i Norsk Målungdom.
§ 17 Lova til Norsk Målungdom gjeld når ein skal avgjera
om laget er lagt ned eller har skift føremål.
Lovbrigde
§ 18 Framlegg til lovbrigde skal vera kunngjort minst
14 dagar før årsmøtet. Årsmøtet kan då vedtaka brigdet
med 2/3 fleirtal.
Ymist
§ 19 Lover og føresegner for Norsk Målungdom som omhandlar
tilhøve i målungdomslaga eller organisasjonen ålment, gjeld
òg for Studentmållaget i Nidaros.
| 
