Årets NM vart arrangert 2-5 feb. på Lygna. NTNUI stilte i år som mange andre år opp med mange løparar. Heile 21 NTNUI-arar sette denne helga kursen mot Lygna, der me var godt representerte i stafetten med heile tri damelag og fire herrelag.

Turen gjekk i bilar sørover. Fyrste stopp vart Lillehammer som for underteikna var fyrste gong i OL-byen. Her fekk me med oss hovudtrekka av det Lillehammer har å by på, med kafé besøk på kjøpesenteret og litt lokal kultur. Kultur i form av ei dame som kunne hjelpe oss med ALT (alternativmedisin), og visstnok hadde våre «coach» på Kjendisfarmen.

Etter ein matpause i Lillehammer gjekk turen vidare til helgas overnattingsstad, Hadeland folkehøgskule. For mange var dette fyrste møtet med folkehøgskulelivet. Etter ein kjapp sjekk på nettet fann me ut at folkehøgskulen hadde litt av kvart på undervisningsprogrammet, deriblant Aikido, Kenjutsu, Helse og Helhet, Vikingstudie og K-pop Korean waves. Midt i blinken for vårt interesseområde.

Laurdag morgon starta med test av løypene til sundagens stafett. Konklusjon: flotte forhold, god stemning og feste er absolutt nødvendig. Etter løypetest var NTNUI med på å heie frem løparane under skiathlonet. Laurdagskvelden vart nytta til skismurning i søppelskuret bak folkehøgskulen, restaurantbesøk og påfølgande tilflukt i kjellerstova medan folkehøgskulereunion med 50-/60- tals tema føregjekk over oss.

Sundag var det endelig duka for stafett. Damelaga var fyrst ut, nå skulle me få feste! Så då var det berre å starta å spør etter dagens smøretips (plan A: smøre sjølv, plan B: smile fint og bruke sjarmen). At nokon var litt småstressa viste nok på oss, så plan B fungerte heilt utmerka. Alltid kjekt når konkurrentane smørar skia for deg. Damelaga leverte flotte resultat, med respektive 16-ene, 58-ene og 77-ene plass.

I herreklassen var det 155 startane lag. NTNUI stilte mannsterkt opp med heile fire lag. NTNUI 1 leverte gode resultat og kom i mål til en sterk 79-ene plass. Resten av NTNUIs herrelag fekk dessverre ikkje fullføra stafetten, men for dei som fekk gått vart det rapportert om god stemning og oppmuntrande «Hu og Hei» rop langs løypa.

Takk for ei stråland helg, alltid kjekt å vera med NTNUI-langrenn på tur 🙂